Air India flights to Kuwait, Oman, Qatar, UAE delayed: ಕೆಲ ಮಧ್ಯಪ್ರಾಚ್ಯ ಪ್ರದೇಶಗಳಿಗೆ ಹೋಗುವ ಏರ್ ಇಂಡಿಯಾದ ಫ್ಲೈಟ್ಗಳ ಪ್ರಯಾಣ ಅವಧಿ ದೀರ್ಘವಿರಲಿದೆ. ಇರಾಕ್, ಇರಾನ್ ಬದಲು ಪರ್ಯಾಯ ಮಾರ್ಗ ಬಳಸುವ ಕಾರಣಕ್ಕೆ ಈ ವಿಳಂಬ ಇರಲಿದೆ ಎಂದು ಏರ್ ಇಂಡಿಯಾ ಹೇಳಿದೆ. ಕುವೇತ್, ಓಮನ್ ಇತ್ಯಾದಿ ಕಡೆ ಹೋಗುವ ವಿಮಾನಗಳಿಗೆ ಇದರ ಎಫೆಕ್ಟ್ ಇರುತ್ತದೆ.
ನವದೆಹಲಿ, ಜೂನ್ 22: ಯುದ್ಧ ಸಂಭವಿಸುತ್ತಿರುವ ಪರ್ಷಿಯನ್ ಗಲ್ಫ್ ಪ್ರದೇಶದ ವಾಯುವಾರ್ಗವನ್ನು (persian gulf) ಬಳಸದಿರಲು ಏರ್ ಇಂಡಿಯಾ ನಿರ್ಧರಿಸಿದೆ. ಇರಾನ್, ಇರಾಕ್ ಮತ್ತು ಇಸ್ರೇಲ್ ಮೇಲೆ ಹಾದು ಹೋಗುವುದನ್ನು ತಪ್ಪಿಸಲು ಬೇರೆ ಪರ್ಯಾಯ ಮಾರ್ಗಗಳಲ್ಲಿ ಏರ್ ಇಂಡಿಯಾ (Air India) ಸಂಚರಿಸುತ್ತಿದೆ. ಈ ಬಗ್ಗೆ ಮಾಹಿತಿ ನೀಡಿರುವ ಏರ್ ಇಂಡಿಯಾ ವಕ್ತಾರರು, ಈ ಮಾರ್ಗ ಬದಲಾವಣೆ (flight re-route) ಕಾರಣಕ್ಕೆ ಕೆಲ ಫ್ಲೈಟ್ಗಳ ಸಂಚಾರ ಸಮಯ ಅಧಿಕಗೊಂಡಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.
ಭಾರತದಿಂದ ಯುಎಇ, ಕತಾರ್, ಓಮನ್, ಕುವೇತ್ ದೇಶಗಳಿಗೆ ಹೋಗಲು ವಿಮಾನಗಳು ಇರಾಕ್, ಇರಾನ್ ವಾಯು ಪ್ರದೇಶವನ್ನು ಬಳಕೆ ಮಾಡುತ್ತವೆ. ಯೂರೋಪ್ ಮತ್ತು ಅಮೆರಿಕಕ್ಕೆ ಹೋಗಲು ಕೆಲ ಫ್ಲೈಟ್ಗಳು ಇಸ್ರೇಲ್ ಅನ್ನು ಹಾದು ಹೋಗುತ್ತವೆ. ಈಗ ಯುದ್ಧದ ಸಂದರ್ಭ ಇರುವುದರಿಂದ ಇರಾನ್, ಇರಾಕ್ ಮತ್ತು ಇಸ್ರೇಲ್ ವಾಯು ಪ್ರದೇಶವನ್ನು ಬಳಕೆ ಮಾಡದಿರಲು ಏರ್ ಇಂಡಿಯಾ ನಿರ್ಧರಿಸಿದೆ.
ಪರ್ಯಾಯ ಮಾರ್ಗ ಯಾವುದು ಹೇಳಲಾಗಿಲ್ಲ. ಆದರೆ, ನಿಗದಿತ ವೇಳೆಗೆ ಪ್ರಯಾಣ ಪೂರ್ಣವಾಗುವುದಿಲ್ಲ. ವಿಳಂಬವಾಗುವ ಸಾಧ್ಯತೆ ಇದೆ. ಇತರ ಏರ್ಲೈನ್ಸ್ ಕಂಪನಿಗಳ ಫ್ಲೈಟ್ಗಳ ಪ್ರಯಾಣ ಅವಧಿ ಹೆಚ್ಚಳಗೊಂಡಿದೆ. ಈ ಕಾರಣಕ್ಕೆ ಏರ್ ಇಂಡಿಯಾದ ಇವತ್ತಿನ ಎರಡು ಫ್ಲೈಟ್ಗಳನ್ನು ರದ್ದುಗೊಳಿಸಿದ ಘಟನೆಯೂ ನಡೆದಿದೆ.
ದೆಹಲಿಯಿಂದ ಫ್ರಾಂಟ್ಫುರ್ಟ್ ಹಾಗೂ ದೆಹಲಿಯಿಂದ ಝುರಿಚ್ ಮಾರ್ಗದ ಎರಡು ಫ್ಲೈಟ್ಗಳನ್ನು ಏರ್ ಇಂಡಿಯಾ ರದ್ದುಗೊಳಿಸಿದೆ. ಪರ್ಯಾಯ ಮಾರ್ಗಗಳಲ್ಲಿ ಬೇರೆ ಫ್ಲೈಟ್ಗಳೂ ಸಂಚರಿಸುತ್ತಿರುವುದರಿಂದ ಅನಿವಾರ್ಯವಾಗಿ ಈ ಎರಡು ಫ್ಲೈಟ್ಗಳನ್ನು ರದ್ದುಗೊಳಿಸಿರಬಹುದು.
ಇರಾನ್ ಮತ್ತು ಇಸ್ರೇಲ್ ನಡುವಿನ ಸಂಘರ್ಷ ಶುರುವಾಗಿ ಇವತ್ತಿಗೆ 11 ದಿನಗಳಾಗಿವೆ. ಇರಾನ್ನಿಂದ ದಾಳಿಯಾಗುವ ಸಾಧ್ಯತೆ ಇರಬಹುದು ಎನ್ನುವ ಎಣಿಕೆಯಲ್ಲಿ ಇಸ್ರೇಲ್ ಮುನ್ನೆಚ್ಚರಿಕೆಯಾಗಿ ಇರಾನ್ ಮೇಲೆ ದಾಳಿ ಮಾಡಿತು. ಆ ಬಳಿಕ ಎರಡೂ ದೇಶಗಳು ಪರಸ್ಪರ ಕ್ಷಿಪಣಿ, ಡ್ರೋನ್ಗಳ ಸುರಿಮಳೆಯನ್ನೇ ಸುರಿಸಿವೆ. ಶನಿವಾರ ಅಮೆರಿಕ ತನ್ನ ಬಂಕರ್ ಬಾಂಬ್ ಅನ್ನು ಹಾಕಿ ಇರಾನ್ನ ಪರಮಾಣ ಘಟಕವನ್ನು ನಾಶಗೊಳಿಸಲು ಯತ್ನಿಸಿದೆ.
ಅಮೆರಿಕದ ದಾಳಿಯನ್ನು ಇರಾನ್ ತೀರಾ ಗಂಭೀರವಾಗಿ ತೆಗೆದುಕೊಂಡಿರುವುದಾಗಿ ಹೇಳಿದೆ. ಇರಾನ್ ಮುಂದಿನ ನಡೆ ಏನು ಎಂಬುದು ನಿಗೂಢವಾಗಿದೆ. ಇದೇ ವೇಳೆ, ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರು ಇರಾನ್ ಅಧ್ಯಕ್ಷರೊಂದಿಗೆ ದೂರವಾಣಿಯಲ್ಲಿ ಮಾತನಾಡಿ, ಪರಿಸ್ಥಿತಿ ಬಗ್ಗೆ ಆತಂಕ ವ್ಯಕ್ತಪಡಿಸಿದ್ದಾರೆ.
