ದುಬೈ: ಅನಿವಾಸಿಯ ಭಾರತೀಯರ ಬದ್ರಿಯಾ ಫ್ರೆಂಡ್ಸ್‌ ಯುಎಇ ವತಿಯಿಂದ ನಡೆದ 7 ನೇ ಆವೃತ್ತಿಯ ʼಬದ್ರಿಯಾ ಪ್ರೀಮಿಯರ್‌ ಲೀಗ್‌ʼ ನಿಗದಿತ ಓವರ್‌ಗಳ ಕ್ರಿಕೆಟ್‌ ಪಂದ್ಯಕೂಟದಲ್ಲಿ ಮಾಸ್ಟರ್ಸ್‌ ಬದ್ರಿಯಾ ವಿಜೇತ ತಂಡವಾಗಿ ಹೊರಹೊಮ್ಮಿತು.
ಅಲ್‌ಐನ್‌ನ ಖತಮ್‌ ಅಲ್‌ ಶಿಖಾ ಕ್ರಿಕೆಟ್‌ ಸ್ಟೇಡಿಯಂನಲ್ಲಿ ನಡೆದ ಪಂದ್ಯಾಟದಲ್ಲಿ ಒಟ್ಟು 5 ತಂಡಗಳು ಭಾಗವಹಿಸಿದ್ದು, ಅಂತಿಮವಾಗಿ ಮಾಸ್ಟರ್ಸ್‌ ಬದ್ರಿಯಾ ಹಾಗೂ ಥಂಡರ್‌ ಬದ್ರಿಯಾ ನಡುವೆ ಫೈನಲ್‌ ಪಂದ್ಯ ನಡೆಯಿತು. ನಿಗದಿತ 4 ಓವರ್‌ಗಳಲ್ಲಿ ಮಾಸ್ಟರ್ಸ್‌ ಬದ್ರಿಯಾ ತಂಡವು 4 ವಿಕೆಟ್‌ ಕಳೆದುಕೊಂಡು 55 ರನ್‌ ಕಲೆ ಹಾಕಿತು. ಗುರಿ ಬೆನ್ನತ್ತಿದ ಥಂಡರ್‌ ಬದ್ರಿಯಾ ತಂಡವು 4 ಓವರ್‌ಗಳಲ್ಲಿ 6 ವಿಕೆಟ್‌ ಕಳೆದುಕೊಂಡು 35 ರನ್‌ ಸೇರಿಸಲಷ್ಟೇ ಶಕ್ತವಾಯಿತು.
ಫೈನಲ್‌ ಪಂದ್ಯದ ಪಂದ್ಯಶ್ರೇಷ್ಠ ಹಾಗೂ ಸರಣಿ ಶ್ರೇಷ್ಠ ಪ್ರಶಸ್ತಿಯನ್ನು ಮಾಸ್ಟರ್ಸ್‌ ಬದ್ರಿಯಾ ತಂಡದ ಬೈರೋಝ್‌ ತನ್ನದಾಗಿಸಿಕೊಂಡರು. ಬೆಸ್ಟ್‌ ಬೌಲರ್‌ ಪ್ರಶಸ್ತಿಯನ್ನು ಕುಡ್ಲ ನೈಟ್‌ ರೈಡರ್ಸ್‌ ತಂಡದ ಹೈದರ್‌ ಪಡೆದುಕೊಂಡರು.
ಪಂದ್ಯಕೂಟದ ಸಂಘಟಕರಾದ, ಬದ್ರಿಯಾ ಫ್ರೆಂಡ್ಸ್‌ ಅಧ್ಯಕ್ಷ ಅರಫಾ, ನಝೀರ್‌ ಬಿಕರ್ನಕಟ್ಟೆ, ಶಫಾಫ್‌, ಅನ್ವರ್‌ ಸಾದತ್, ಲತೀಫ್‌ ಬಿಎಲ್‌ ಮತ್ತಿತ್ತರರು ಉಪಸ್ಥಿತರಿದ್ದರು.
