ವಿಜಯಪುರ(ಸೆ.13): ಆತ ವೈದ್ಯಕೀಯ ಕಾಲೇಜಿನಲ್ಲಿ ಲ್ಯಾಬ್ ಇನ್ ಚಾರ್ಜ್ ಆಗಿದ್ದ. ಲ್ಯಾಬ್ ಗೆ ಬರುತ್ತಿದ್ದ ವೈದ್ಯಕೀಯ ವಿದ್ಯಾರ್ಥಿಗಳನ್ನು ಕಂಡು ನನ್ನ ಮಗಳು ಡಾಕ್ಟರ್ ಆಗಬೇಕು ಎಂದು ಕನಸು ಕಾಣುತ್ತಿದ್ದ. ಇದೀಗ ತಂದೆಯ ಕನಸನ್ನು ಮಗಳು ನನಸು ಮಾಡಿದ್ದಾಳೆ. ಬಡತನದಲ್ಲಿಯೇ ಓದಿ ಬೆಳೆದ ಮಗಳು ವೈದ್ಯಕೀಯ ಸ್ನಾತಕೋತ್ತರ ಪದವಿ ಮುಗಿಸಿ ತಂದೆಯ ಗರಿಮೆಯನ್ನು ಹೆಚ್ಚಿಸಿದ ವಿದ್ಯಾರ್ಥಿನಿ.ನೀನು ಏನಾದರೂ ಓದು ಗಮನವಿಟ್ಟು ಓದು. ಓದಿನಲ್ಲಿಯೇ ಏನನ್ನಾದರೂ ಸಾಧಿಸು ಎನ್ನುವ ತಂದೆ-ತಾಯಿಯ ಮಾತನ್ನು ಕೇಳುತ್ತಾ, ತನ್ನಲ್ಲಿಯೇ ಸಾಧಿಸುವ ಛಲವನ್ನು ಬೆಳೆಸಿಕೊಂಡು ಸರಕಾರಿ ಕೋಟಾದಲ್ಲಿಯೇ ಸ್ನಾತಕೋತ್ತರ ವೈದ್ಯಕೀಯ ಪದವಿ ಪಡೆದ ಹಾಜ್ರ ತಸ್ನಿಮ್ ಮಸಳಿ ಬಡತನದಲ್ಲಿ ಅರಳಿದವಳು.
ತಂದೆ ರಫೀಕ್‌ ಮಸಳಿ ವಿಜಯಪುರದ ಖಾಸಗಿ ಕಾಲೇಜಿನಲ್ಲಿ ಲ್ಯಾಬ್ ಇನ್ ಚಾರ್ಜ್ ಆಗಿದ್ದವರು, ಹಾಗೂ ತಾಯಿ ಯಾಸ್ಮಿನ್ ಖಾಸಗಿ ಶಾಲೆಯಲ್ಲಿ ಟೀಚರ್ ಆಗಿ ಕೆಲಸ ಮಾಡುತ್ತಿದ್ದಾರೆ. ಇವರ ಮಗಳೇ ಹಾಜ್ರ ತಸ್ನಿಮ್. ವಿದ್ಯಾರ್ಥಿ ದೆಸೆಯಿಂದಲೇ ರ‍್ಯಾಂಕ್ ಸ್ಟುಡೆಂಟ್ ಆಗಿದ್ದ ಈಕೆ, ಪಿಯುಸಿ ವಿಜ್ಞಾನ ವಿಭಾಗದಲ್ಲಿ ಜಿಲ್ಲೆಗೆ ಎರಡನೇ ಸ್ಥಾನ ಪಡೆದವಳು. ನಂತರ ಅಲ್ಪಸಂಖ್ಯಾತರ ಕೋಟಾದಲ್ಲಿ ಉಚಿತವಾಗಿ ಅಲ್ ಅಮೀನ್ ಮೆಡಿಕಲ್ ಕಾಲೇಜಿನಲ್ಲಿ ಎಂ.ಬಿ.ಬಿ.ಎಸ್ ಸೀಟು ಗಿಟ್ಟಿಸಿಕೊಂಡು, ಈಗ ಬಿಎಲ್ಡಿಇ ಡೀಮ್ಡ್ ವಿವಿಯಿಂದ ಮೈಕ್ರೋ ಬಯಾಲಜಿ ವಿಭಾಗದಲ್ಲಿ ಸ್ನಾತಕೋತ್ತರ ಪದವಿ ಪಡೆದಿದ್ದಾಳೆ.
ನಿನ್ನೆ ನಡೆದ ಬಿಎಲ್ಡಿಇ ಡೀಮ್ಡ್ ವಿವಿಯ ಘಟಿಕೋತ್ಸವದಲ್ಲಿ ಸಂಸ್ಥೆಯ ಅಧ್ಯಕ್ಷ ಎಂ.ಬಿ.ಪಾಟೀಲ್ ಅವರಿಂದ ಪದವಿಯ ಪ್ರಮಾಣ ಪತ್ರ ಪಡೆಯುವಾಗ ಅವಳ ಸಂತಸಕ್ಕೆ ಪಾರವೇ ಇರಲಿಲ್ಲ. ನಾನು ವೈದ್ಯಯೇ ಆಗಬೇಕೆಂಬ ಕನಸು ಕಂಡವಳಲ್ಲ, ಕಾರಣ ನಮ್ಮ ಬಡತನ. ಹೇಗಾದರೂ ಮಾಡಿ ಬಡತನ ಹೋಗಲಾಡಿಸಬೇಕು, ಇದಕ್ಕೆ ಓದುವುದು, ಒಳ್ಳೆಯ ಶಿಕ್ಷಣ ಪಡೆಯುವುದು ಒಂದೇ ಮಾರ್ಗ ಎಂದು ನಾನು ನಂಬಿದ್ದೆ. ನನ್ನ ಓದಿನ ಶ್ರಮಕ್ಕೆ ಇಂದು ಪ್ರತಿಫಲ ಸಿಕ್ಕಿದೆ ಅಂತ ಸಂತಸ ವ್ಯಕ್ತಪಡಿಸಿದಳು.
ಮನೆಯವರಲ್ಲದೆ ಊರಿನವರೂ ನನ್ನ ಬಗ್ಗೆ ಮಾತನಾಡಿಕೊಂಡು ಖುಷಿ ಪಡುತ್ತಾರೆ. ಇದ್ದರೆ ನಿನ್ನಂತಹ ಮಗಳಿರಬೇಕು. ಹಠ ಮಾಡಿ ಓದಿ ಸಾಧನೆ ಮಾಡಿದ್ದೀಯ, ಇದು ಇಷ್ಟಕ್ಕೆ ನಿಲ್ಲಬಾರದು, ಇನ್ನಷ್ಟು ಓದಿ ಏನನ್ನಾದರೂ ಸಾಧನೆ ಮಾಡು ಎಂದು ಪ್ರೋತ್ಸಾಹಿಸುತ್ತಿದ್ದಾರೆ. ಅಪ್ಪ, ಅಮ್ಮನಿಗೆ ನನ್ನನ್ನು ಎಷ್ಟು ಹೊಗಳಿದರೂ ಸಮಾಧಾನವಿಲ್ಲ. ಮುಂದೆ ಪಿಎಚ್‌ಡಿ ಮಾಡಬೇಕೆಂಬ ಆಸೆ ಇದೆ ಎಂದು ತಮ್ಮ ಸಂತಸ ಹಂಚಿಕೊಂಡರು.
