ನಗರದಲ್ಲಿ ಬೀಡು ಬಿಟ್ಟ ಚಡ್ಡಿಗ್ಯಾಂಗ್​.. ಶಾಲೆಯೊಂದಕ್ಕೆ ನುಗ್ಗಿ ಲಕ್ಷ ಲಕ್ಷ ರೂಪಾಯಿ ದೋಚಿ ಎಸ್ಕೇಪ್​

ಹೈದರಾಬಾದ್: ಕರ್ನಾಟಕ, ಮಹಾರಾಷ್ಟ್ರ ಹಾಗೂ ಉತ್ತರ ಭಾರತದಲ್ಲಿ ಸಂಚಲನ ಮೂಡಿಸಿದ್ದ ಚೆಡ್ಡಿಗ್ಯಾಂಗ್ ಈಗ ತೆಲಂಗಾಣಕ್ಕೆ ಶಿಫ್ಟ್​ ಆಗಿದೆ. ಶಾಲೆಯೊಂದಕ್ಕೆ ಮಧ್ಯರಾತ್ರಿ ನುಗ್ಗಿರುವ ಚೆಡ್ಡಿಗ್ಯಾಂಗ್​ನ ಇಬ್ಬರು ಖದೀಮರು 7.85 ಲಕ್ಷ ನಗದು ಕಳ್ಳತನ ಮಾಡಿ ಎಸ್ಕೇಪ್ ಆಗಿದ್ದಾರೆ ಎಂದು ಹೇಳಲಾಗಿದೆ.

ಚೆಡ್ಡಿಗ್ಯಾಂಗ್ ಕಳ್ಳತನ ಮತ್ತೊಮ್ಮೆ ಸಂಚಲನ ಮೂಡಿಸಿದೆ. ಈ ಬಾರಿ ಹೈದರಾಬಾದ್​ ನಗರದ ಮಿಯಾಪುರದ ಹಫೀಜ್‌ಪೇಟೆಯ ವರ್ಲ್ಡ್ ಒನ್ ಖಾಸಗಿ ಶಾಲೆ​ಗೆ ಇಬ್ಬರು ಖದೀಮರು ನುಗ್ಗಿದ್ದಾರೆ. ಚೆಡ್ಡಿ ಧರಿಸಿ, ಮುಖಕ್ಕೆ ಮಾಸ್ಕ್ ಹಾಕಿಕೊಂಡಿರುವ ಕಳ್ಳರು ಕೈಯಲ್ಲಿ ಮಾರಕಾಯುಧಗಳನ್ನ ಹಿಡಿದುಕೊಂಡಿದ್ದಾರೆ. ಶಾಲೆಯ ಆಫೀಸ್​ ರೂಮ್​ನಲ್ಲಿದ್ದ 7.85 ಲಕ್ಷ ರೂಪಾಯಿ ಕಳ್ಳತನ ಮಾಡಿ ಆರೋಪಿಗಳು ಪರಾರಿಯಾಗಿದ್ದಾರೆ ಎನ್ನಲಾಗಿದೆ.

ಸದ್ಯ ಶಾಲೆಯ ಮಾಲೀಕರು ಮಿಯಾಪುರ ಪೊಲೀಸ್ ಠಾಣೆಗೆ ದೂರು ನೀಡಿದ್ದು ಈ ಸಂಬಂಧ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ. ಚಡ್ಡಿಗ್ಯಾಂಗ್​ನವರು ಕಳ್ಳತನ ಮಾಡುತ್ತಿರುವ ದೃಶ್ಯಗಳು ಅಲ್ಲಿನ ಸಿಸಿಟಿವಿ ಕ್ಯಾಮೆರಾಗಳಲ್ಲಿ ಸೆರೆಯಾಗಿವೆ. ಈ ದೃಶ್ಯಾವಳಿಗಳನ್ನು ಪೊಲೀಸರು ಪರಿಶೀಲಿಸುತ್ತಿದ್ದಾರೆ. ಕೆಲ ದಿನಗಳಿಂದ ಕಾಣದ ಚೆಡ್ಡಿ ಗ್ಯಾಂಗ್ ಮತ್ತೆ ನಗರದಲ್ಲಿ ಪ್ರತ್ಯಕ್ಷವಾಗಿದ್ದರಿಂದ ನಿವಾಸಿಗಳು ಆತಂಕ ವ್ಯಕ್ತಪಡಿಸುತ್ತಿದ್ದಾರೆ ಎಂದು ಹೇಳಲಾಗಿದೆ.