Ashraf Kammaje
Updated on: Jul 15, 2023 | 2:56 PM
ದೆಹಲಿ, ಜುಲೈ 15: ಪ್ರಧಾನಿ ನರೇಂದ್ರ ಮೋದಿ ಅವರು ಫ್ರಾನ್ಸ್ ಪ್ರವಾಸ ಮುಗಿಸಿ, ಯುಎಇಗೆ ಭೇಟಿ ನೀಡಿದ್ದಾರೆ, ಫ್ರಾನ್ಸ್ಗೆ ಎರಡು ದಿನಗಳ ಭೇಟಿ ಮುಗಿಯುತ್ತಿದ್ದಂತೆ, ಅಬುಧಾಬಿಗೆ ರಾಜತಾಂತ್ರಿಕ ಒಂದು ದಿನದ ಭೇಟಿ ನೀಡಿದ್ದಾರೆ, ಪ್ರಧಾನಿ ಮೋದಿ ಅವರನ್ನು ಅಬುಧಾಬಿ ಕ್ರೌನ್ ಪ್ರಿನ್ಸ್ ಶೇಖ್ ಖಲೀದ್ ಬಿನ್ ಮೊಹಮ್ಮದ್ ಬಿನ್ ಜಾಯೆದ್ ಅಲ್ ನಹ್ಯಾನ್ ಅವರು ವಿಧ್ಯುಕ್ತವಾಗಿ ಬರಮಾಡಿಕೊಂಡಿದ್ದಾರೆ. ಭಾರತ-ಯುಎಇ ಸಮಗ್ರ ಕಾರ್ಯತಂತ್ರದ ಸಹಭಾಗಿತ್ವವು ಉತ್ತಮವಾಗಿ ಬಲಗೊಳ್ಳುತ್ತಿದೆ ಮತ್ತು ಇದನ್ನೂ ಮುಂದಕ್ಕೂ ಹೀಗೆ ಕೊಂಡೊಯ್ಯವ ಸಲುವಾಗಿ ಪ್ರಧಾನಿ ಮೋದಿ ಅವರು ಮತ್ತೊಮ್ಮೆ ಭೇಟಿ ನೀಡಿದ್ದಾರೆ. ಜಾಗತಿಕ ಸಮಸ್ಯೆಗಳು, ಇಂಧನ, ಶಿಕ್ಷಣ, ಆರೋಗ್ಯ, ಆಹಾರ ಭದ್ರತೆ, ರಕ್ಷಣೆ ಮತ್ತು ಸಂಸ್ಕೃತಿಯಂತಹ ವಿವಿಧ ಕ್ಷೇತ್ರಗಳ ಅಭಿವೃದ್ಧಿಯ ಕುರಿತು ಉಭಯ ರಾಷ್ಟ್ರಗಳು ಮಾತುಕತೆ ನಡೆಸಲಿದ್ದು, ಅದಕ್ಕಾಗಿಯೇ ಈ ಭೇಟಿ ಹೆಚ್ಚು ಮಹತ್ವ ಪಡೆದುಕೊಂಡಿದೆ. ಭಾರತದ G-20 ಪ್ರೆಸಿಡೆನ್ಸಿಗೆ ಯುಎಇಯನ್ನು ವಿಶೇಷವಾಗಿ ಆಹ್ವಾನಿಸಲು ಕೂಡ ಈ ಭೇಟಿ ಹೆಚ್ಚು ಪ್ರಾಮುಖ್ಯತೆಯನ್ನು ಹೊಂದಿದೆ ಎಂದು ಹೇಳಿದ್ದಾರೆ
#WATCH | PM Modi arrives in Abu Dhabi, UAE on an official visit, to hold meeting with President Sheikh Mohamed bin Zayed Al Nahyan on key bilateral issues pic.twitter.com/DJRAlBUOge
— ANI (@ANI) July 15, 2023
ಭಾರತ – ಯುಎಇ ನಡುವೆ ಬೆಳೆಯುತ್ತಿರುವ ಸ್ನೇಹ
2014ರಲ್ಲಿ ಅಧಿಕಾರ ವಹಿಸಿಕೊಂಡ ನಂತರ, ಇದು ಯುಎಇಗೆ ಪ್ರಧಾನಿ ಮೋದಿಯವರ ಐದನೇ ಭೇಟಿಯಾಗಿದೆ. ಕಳೆದ ವರ್ಷವೂ ಪ್ರಧಾನಿ ಮೋದಿ, ಜರ್ಮನಿಯಲ್ಲಿ ನಡೆದ ಜಿ7 ಶೃಂಗಸಭೆಯಿಂದ ಹಿಂದಿರುಗುವಾಗ ಯುಎಇಗೆ ಹೋಗಿ ಬಂದಿದ್ದರು. ಯುಎಇಗೆ ಪ್ರಧಾನಿ ಮೋದಿ ನೀಡಿದ ಭೇಟಿ ಉಭಯ ದೇಶಗಳ ‘ಸಮಗ್ರ ಕಾರ್ಯತಂತ್ರಕ್ಕೆ ಹೊಸ ಅಧ್ಯಾಯದ ಆರಂಭವಾಗಿದೆ ಎಂದು ಭಾರತ ಸರ್ಕಾರ ಹೇಳಿದೆ.
ಭಾರತ-ಯುಎಇ ಎಲ್ಲ ಕ್ಷೇತ್ರದಲ್ಲೂ ಒಟ್ಟಾಗಿ ಕೆಲಸ ಮಾಡುತ್ತಿದೆ. ಇಂಧನ, ಶಿಕ್ಷಣ, ಆರೋಗ್ಯ, ಆಹಾರ ಭದ್ರತೆ, ಫಿನ್‌ಟೆಕ್, ರಕ್ಷಣೆ ಮತ್ತು ಸಂಸ್ಕೃತಿಯಂತಹ ವಿವಿಧ ಕ್ಷೇತ್ರಗಳಲ್ಲಿ ಒಟ್ಟಾಗಿ ಹೋಗಲು ಸಹಾಯವಾಗಲಿದೆ ಈ ಭೇಟಿ ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯ (MEA) ಹೇಳಿದೆ.
ಕಳೆದ ವರ್ಷ ಭಾರತ ಮತ್ತು ಯುಎಇ ನಡುವೆ ಸಹಿ ಹಾಕಲಾದ ಸಮಗ್ರ ಆರ್ಥಿಕ ಪಾಲುದಾರಿಕೆ ಒಪ್ಪಂದ (ಸಿಇಪಿಎ) ಕೂಡ ದ್ವಿಪಕ್ಷೀಯ ವ್ಯಾಪಾರವನ್ನು ಉತ್ತೇಜಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದೆ. ಈ ಒಪ್ಪಂದವು ಯುಎಇಗೆ ಭಾರತದ ರಫ್ತುಗಳ ಮೇಲೆ ಗಮನಾರ್ಹ ಪರಿಣಾಮ ಬೀರಿದೆ, ವಿಶೇಷವಾಗಿ ತೈಲದ ವಿಷಯದಲ್ಲಿ ಹೆಚ್ಚು ಲಾಭವನ್ನು ಪಡೆದುಕೊಂಡಿದೆ.
ಎರಡು ರಾಷ್ಟ್ರಗಳ ನಡುವಿನ ವ್ಯಾಪಾರದ ಪ್ರಮಾಣವು ಗರಿಷ್ಠ ಮಟ್ಟವನ್ನು ತಲುಪಿದೆ, 2021-2022 ರ ಆರ್ಥಿಕ ವರ್ಷದಲ್ಲಿ $ 72.9 ಶತಕೋಟಿಯಿಂದ 2022-2023ರ ಆರ್ಥಿಕ ವರ್ಷದಲ್ಲಿ $ 84.5 ಶತಕೋಟಿಗೆ ಏರಿದೆ, ಇದು ವರ್ಷದಿಂದ ವರ್ಷಕ್ಕೆ 16 ಶೇಕಡಾದಷ್ಟು ಹೆಚ್ಚಳವಾಗಿದೆ.
ಯುಎಇಯೊಂದಿಗಿನ ನಮ್ಮ ಸಂಬಂಧವು ವೈಯಕ್ತಿಕ ಅಂಶವನ್ನೂ ಒಳಗೊಂಡಿದ್ದು, ಯುಎಇ 3.5 ಮಿಲಿಯನ್ ಭಾರತೀಯರಿಗೆ ವಾಸವಾಗಲು ಅವಕಾಶ ನೀಡಿದೆ, ಇದು ಯುಎಇಯಲ್ಲಿನ ಅತಿದೊಡ್ಡ ವಲಸಿಗ ಸಮುದಾಯವಾಗಿದೆ. ಯುಎಇ ಭಾರತೀಯರಿಗೆ ಸಾಕಷ್ಟು ಅವಕಾಶಗಳನ್ನು ನೀಡಿದ್ದು, ಇದು ಭಾರತದ ಆರ್ಥಿಕ ಬೆಳವಣಿಗೆಯಲ್ಲಿ ಪ್ರಮುಖ ಪಾತ್ರವನ್ನು ವಹಿಸುತ್ತದೆ.
ಇತ್ತೀಚೆಗೆ ಯುಎಇ ಸರ್ಕಾರವು ಅಬುಧಾಬಿಯಲ್ಲಿ ದೇವಾಲಯದ ನಿರ್ಮಾಣಕ್ಕಾಗಿ 26 ಎಕರೆ ಭೂಮಿಯನ್ನು ಮಂಜೂರು ಮಾಡಿತು, ಇದು ಉಭಯ ದೇಶಗಳ ನಡುವಿನ ಪರಸ್ಪರ ಗೌರವ ಮತ್ತು ಸಹಕಾರದ ಬೆಳವಣಿಗೆಯ ಸಂಕೇತವಾಗಿದೆ.
ವ್ಯಾಪಾರ ಮತ್ತು ರಕ್ಷಣಾ
ಯುಎಇ ಮತ್ತು ಭಾರತವು 2022ರಲ್ಲಿ ಸಹಿ ಮಾಡಿದ ಸಮಗ್ರ ಆರ್ಥಿಕ ಪಾಲುದಾರಿಕೆ ಒಪ್ಪಂದ (ಸಿಇಪಿಎ) ದೇಶಗಳ ದ್ವಿಪಕ್ಷೀಯ ವ್ಯಾಪಾರ ಮತ್ತು ಹೂಡಿಕೆಗಳಲ್ಲಿ ಉತ್ತೇಜನಕ್ಕೆ ಕಾರಣವಾದ ಪ್ರಮುಖ ಅಂಶವಾಗಿದೆ. ಯುನೈಟೆಡ್ ಸ್ಟೇಟ್ಸ್ (ಯುಎಸ್) ಮತ್ತು ಚೀನಾ ನಂತರ ಯುಎಇ ಭಾರತದ ಮೂರನೇ ಅತಿದೊಡ್ಡ ವ್ಯಾಪಾರ ಪಾಲುದಾರ.
ಈ ಸಂಖ್ಯೆಯನ್ನು ಮತ್ತಷ್ಟು ಹೆಚ್ಚಿಸಲು ನೋಡುತ್ತಿರುವ ಸಿಇಪಿಎ ಒಪ್ಪಂದವು ಐದು ವರ್ಷಗಳಲ್ಲಿ ಎರಡು ದೇಶಗಳ ನಡುವಿನ ವ್ಯಾಪಾರವನ್ನು $45 ಶತಕೋಟಿಯಿಂದ $100 ಶತಕೋಟಿಗೆ ಹೆಚ್ಚಿಸುವ ಗುರಿಯನ್ನು ಹೊಂದಿದೆ. ಕಳೆದ ವರ್ಷವೊಂದರಲ್ಲೇ, ದ್ವಿಪಕ್ಷೀಯ ವ್ಯಾಪಾರದ ಪ್ರಮಾಣವು $72.9 ಶತಕೋಟಿಯಿಂದ $84.5 ಶತಕೋಟಿಗೆ ಏರಿದೆ.
CEPA ಒಪ್ಪಂದದ ನಂತರ ಸುಧಾರಣೆಯನ್ನು ಕಾಣಬಹುದಾದ ಇತರ ಪ್ರಮುಖ ಅಂಶಗಳೆಂದರೆ ದ್ವಿಪಕ್ಷೀಯ ವ್ಯಾಪಾರದಲ್ಲಿ 30 ಪ್ರತಿಶತದಷ್ಟು ನಿರೀಕ್ಷಿತ ಹೆಚ್ಚಳ ಮತ್ತು ಭಾರತದಲ್ಲಿ ಸುಮಾರು ಒಂದು ಮಿಲಿಯನ್ ಉದ್ಯೋಗಗಳ ಸೃಷ್ಟಿ.
ಭಾರತದ ತೈಲ ವಲಯ ಮತ್ತು ಹೈಡ್ರೋಕಾರ್ಬನ್ ಅಲ್ಲದ ವಲಯಗಳಲ್ಲಿನ ಹೂಡಿಕೆಗಳು ಭಾರತಕ್ಕೆ ಅಗಾಧವಾದ ಶಕ್ತಿ ಮತ್ತು ಆರ್ಥಿಕ ಪ್ರಯೋಜನಗಳನ್ನು ಉಂಟುಮಾಡಬಹುದು ಎಂದು ಹೇಳಲಾಗಿದೆ.
ಯುಎಇ ಭಾರತಕ್ಕೆ ಪ್ರಮುಖ ರಕ್ಷಣಾ ಪಾಲುದಾರನಾಗಿಯೂ ಕಾರ್ಯನಿರ್ವಹಿಸುತ್ತದೆ. ಉಭಯ ದೇಶಗಳ ನಡುವೆ ಸೇನಾ ಸಹಕಾರದಲ್ಲಿ ನಿರಂತರ ಏರಿಕೆ ಕಂಡುಬಂದಿದೆ. ಇದು ಮಿಲಿಟರಿಯ ಎಲ್ಲಾ ಹಂತಗಳಲ್ಲಿದೆ, ಉನ್ನತ ಮಟ್ಟದಲ್ಲಿ ನಿಯಮಿತ ವಿನಿಮಯಗಳು ಮತ್ತು ಹಲವಾರು ಮಿಲಿಟರಿ ಶಿಕ್ಷಣ ವಿನಿಮಯಗಳು ಈ ಬೆಳೆಯುತ್ತಿರುವ ಸಹಕಾರಕ್ಕೆ ಪುರಾವೆಗಳಾಗಿವೆ. ಜಂಟಿ ನೌಕಾ ವ್ಯಾಯಾಮಗಳು ಮತ್ತು ಬಂದರು ಕರೆಗಳು ನಮ್ಮ ಪರಸ್ಪರ ಸೌಹಾರ್ದತೆಯಲ್ಲಿ ದೊಡ್ಡ ಪಾತ್ರವನ್ನು ವಹಿಸಿವೆ. ಭಾರತ ಮತ್ತು ಯುಎಇ ನಡುವಿನ ವಾರ್ಷಿಕ ರಕ್ಷಣಾ ಸಂವಾದವು ಕೂಡ ಒಂದು.
